Шимолий Корея етакчиси Ким Чен Ин Владимир Путиннинг таклифига биноан Россияга келади. Бу ҳақда аввалроқ Ғарб ОАВ хабар қилган, душанба куни Кремль ҳам бу маълумотни тасдиқлаган.
“РИА Новости” Путиннинг матбуот котиби Дмитрий Песковга таяниб ёзишича, ташриф чоғида икки давлат раҳбарлари делегациялар музокараларида қатнашади, лозим топилса, яккама-якка учрашади.
Кремлнинг расмий баёноти берилишидан бир неча соат олдин Жанубий Кореянинг YTN телеканали ўз манбасига таяниб, Ким Чен Ин Пхеняндан Россияга поездда жўнаб кетганини ёзган. Нашрга кўра, КХДР раҳбари ҳозирда Шарқий иқтисодий форум ўтаётган Владивостокга йўл олган. Ким Чен Ин Путин билан 13 сентябрда учрашиши мумкин.
The New York Times нашри ҳам Ким Чен Иннинг Владивостокга бориши ҳақида хабар берган эди. Нашрнинг ёзишича, Путин билан учрашувда Ким Чен Ин Россияга артиллерия аслахаси ва аксил-танк ракеталарини етказиб беришни муҳокама қилади.
